Sot në rajonin tonë po mbanë mot kryesisht stabil dhe i nxehtë. Gjatë orëve të pasdites mund të ketë zhvillime të izoluara me ndonjë rrebesh shiu kryesisht në disa zona të izoluara. Gjatë natës mund të kemi aktivizim të atmosferës në disa pjesë të Kosoves me vetëtima dhe rrebeshe lokale shiu dhe kjo mund të jetë vetëm hyrje në atë çfarë na pret ditëve të ardhshme.
Nga nesër pritet të kemi destabilizim të fuqishëm të atmosferes në shumë pjesë të rajonit tonë ku priten të kemi zhvillime të fuqishme të vranësirave të shiut të cilat pritet të kushtëzojnë rrebeshe lokalisht të fuqishme shiu me vetëtima, bubullimë dhe mundësi për breshër. Rrebeshet e fuqishme lokale priten herë pas here, varësisht nga zhvillimet e stuhive lokale në shkallë rajoni.
Në anën tjetër të enjten dhe të premtën kemi ardhjen e një cikloni i cili pritet të fuqizohet në Detin Adriatik duke rrugëtuar drejt Greqisë. Ky ciklon do të sjellë reshje të reja të fuqishme herë pas here në rajonin tonë duke mos përjashtuar edhe problematika me vërshime dhe shtrëngata të fuqishme. Pasi që rrymimet ajrore lartë në atmosferë mund të jenë të ngadalshme ka gjasa që të ketë rrebeshe mjaft të fuqishme afatgjata në ndonjë rajon ku krijohet konveksioni dhe kjo potencialisht mund të shkaktojë përmbytje në disa rajone.
Stuhi të fuqishme shiu priten në tërë rajonin duke filluar nga Sllovenia, Kroacia, Bosnja dhe Hercegovina, Mali i Zi, Shqipëria, Kosova, Maqedonia Veriore dhe Greqia. Stuhitë më të fuqishme dhe reshjet më të rrëmbyeshme priten në Bosnjë dhe Hercegovinë, Serbi dhe Greqi, por asesi nuk duhet nënçmuar potencialin e stuhive dhe rrebesheve të fuqishme edhe në Kosovë, Shqipëri, Mal të Zi dhe Maqedoninë Veriore.
Gjithashtu duhet potencuar fakti se priten edhe shkarkime të fuqishme atmosferike, erëra të fuqishme dhe vende-vende edhe breshër, prandaj gjatë ditëve të ardhshme apelohet për kujdes të shtuar në komunikacion dhe ambiente të hapura sodomos kur të vëreni errësimin e qiellit. Kjo nuk do të thotë se reshje do të ketë pa ndrëprerë, pra reshjet do të vijnë në intervale të caktuara kohore, por priten edhe periudha pa reshje.
Stabilizim gradual të motit presim krejt në fundjavë, por ende mbesin gjasa për riga lokale shiu në viset kontinentale./MeteoBallkan
