Moti mjaft dinamik do të vazhdojë gjatë pjesës më të madhe të muajit të parë të vitit 2021 dhe për këtë duhet të falënderojmë gjendjen sinoptike në Kontinentin e vjetër, Mesdhe dhe tek ne.
Kjo gjendje sinoptike me depërtime të ajrit të ftohtë jo-stabil në Mesdhe dhe krijimin e cikloneve të vazhdueshme në Mesdhe mund të shkaktojë edhe probleme gjatë këtij muaji sepse mund të sjellë reshje të mëdha atmosferike.
Fillimisht ende jemi nën ndikimin e masave të ngrohta ajrore dhe për këtë temperaturat janë të larta dhe reshjet janë në formë shiu. Vetëm në viset malore ka reshje bore, por pas disa ditëve ose një jave mund të kemi depërtimin e masës së ftohtë ajrore me origjinë polare dhe pastaj edhe siberike dhe pastaj ka gjasa të mëdha që të kemi dimër të vërtetë me reshje të dendura bore. Gjendja sinoptike momentale është mjaft premtuese dhe shumë interesante dhe ne do të përcjellim evoluimin e situatës sinoptike dhe do ju njoftojmë me kohë./Meteoballkan
