Disa fshatra në qytete të ndryshme të Kosovës janë përfshirë nga zjarri të shtunën pasdite.
Kryetari i Suharekës, Bali Muharremaj, ka kërkuar ndihmë për shuarjen e vatrave në fshatrat Dubravë, Sallagrazhdë dhe Mushtisht.
Ndërkohë, televizioni lokal RTV Besa ka publikuar video ku shihet një zjarr i madh në fshatin Lubizhdë të Prizrenit.
Edhe në Ferizaj, zjarrfikësi Zmyri Krasniqi ka postuar në Facebook disa fotografi nga terreni, ku po lufton për të lokalizuar flakët. Ai gjithashtu ka ndarë një imazh të një kolegu që është lënduar gjatë përpjekjeve për shuarjen e zjarrit.
Vatra zjarri janë raportuar edhe pranë disa vendbanimeve në Vushtrri, Mitrovicë e Podujevë. KOHA ka kontaktuar autoritetet për të marrë më shumë informacione rreth situatës.
Ditëve të fundit, Kosova është përballur me temperatura ekstreme. Vetëm dje, në Klinë, u regjistrua temperatura më e lartë ndonjëherë sipas Institutit Hidrometeorologjik – 42.5 gradë Celsius.
Kryetari i Suharekës thirrje për ndihmë për të shuar zjarret
Kryetari i Suharekës, Bali Muharremaj, ka bërë thirrje për ndihmë për të shuar zjarret që kanë kapluar disa fshatra të kësaj komune.
Në një postim në Facebook, Muharremaj i ka bërë thirrje kujtdo që ka pajisje për shuarje zjarri të ndihmojnë në fshatrat Dubravë, Sallagrazhdë dhe Mushtisht.
“Me të gjitha kapacitetet institucionale po mundohemi ta mbajmë situatën nën kontroll”, ka shkruar Muharremaj.
Edhe në fshatin Lubizhdë të Prizrenit është raportuar për zjarre të mëdha, ndërsa autoritetet kanë dalë në vendngjarje për ta mbajtur situatën nën kontroll.
Në ditët e fundit, në Kosovë janë regjistruar temperatura rekorde të të nxehtit.
