Një impakt i pandemisë globale COVID-19 është reduktimi i fluturimeve ajrore, e kështu edhe reduktimi i fluturakeve që shërbejnë për parashikimin e motit. Observimet që nxjerren nga këto fluturake, përdoren bashkë me elementet e tjerë të parashikimit për të përcjell gjendjen e Tokës gjatë një prognoze meteorologjike.
Nga modeli më i saktë i parashikimit në botë, ECMWF, thonë se fluturaket kanë vendin e dytë në relevancën e parashikimit të tyre. Megjithatë, për të mbushur këtë vakuum, pas pandemisë, janë duke u shtuar disa satelitë për observimin e erës, të cilët do të ndihmojnë që të zëvendësojnë të dhënat e fluturakeve observuese, shkruan MeteoBallkan.
Megjithatë, nga ECMWF thonë se kjo situatë do të ndikojë negativisht në saktësinë e prognozave.
Fotografia më poshtë tregon numrin e fluturakeve observuese mbi Evropë dhe sinjalet që ka pranuar ECMWF që nga fillimi i muajit mars. Duket qartë se ka rënie të theksuar.
Deri më 23 mars, ka një reduktim prej 65% të raporteve nga këto fluturake krahasuar me periudhën deri më 3 mars. Në shkallë globale ky reduktim shënon rënie prej 42%. /MeteoBallkan/
Burimi: meteo24news.gr