Nga Britania e Madhe e deri në Greqi, nga Spanja e deri në Bullgari, nga Skandinavia e deri në Ballkan ka paralajmërime meteorologjike (weather alerts) që rrallë ndodhë. Paralajmërimet janë nga më të ndryshmet, shi të rrëmbyeshëm, borë, e mbi të gjitha për erëra mjaft të fuqishme dhe kjo e tëra për shkak të depërtimit të mega-ciklonit të fuqishëm nga Atlantiku në drejtim të Evropës. Këtë mega-ciklon e kemi përmendur disa herë në postimet tona të mëhershme.
Efektet e fuqisë së këtij cikloni masiv do ti ndjejmë edhe ne e veçanërisht Shqipëria veriore ku herë pas here priten erëra deri në 100km/h gjatë ditëve të ardhshme. Erërat do të jenë shumë të fuqishme sidomos në viset malore. Edhe në Kosovë priten erëra të fuqishme jugore në malet në veriperëndim dhe veri të Kosovës. Edhe në vise tjera të Kosovës herë pas here priten erëra, por nuk pritet ndonjë ekstrem i madh.
Erëra ekstremisht të fuqishme dhe shira të rrëmbyeshëm ditëve të ardhshme priten në Mal të Zi, Hercegovine dhe jug të Kroacisë kur pritet të ketë edhe dëme të mëdha materiale dhe vërshime.
