Reshjet mund të fillojnë paradite në shumë pjesë të Kosovës si borë ose vende-vende të përziera me shi dhe pastaj për shkak të rrymimeve ajrore nga jugu pritet të shndërrohen në shi, kurse në mbrëmje vonë ose gjatë natës së ardhshme do të ketë depërtim të frontit të ftohtë. Gjatës natës së ardhshme rrymimet ajrore do të ndryshojnë të ftohta nga veriu dhe prapë do të kemi reshje bore në shumë pjesë të Kosovës.
Reshje të dendura priten në mëngjes dhe gjatë ditës në Shqipëri. Shi në ultësira e borë në viset malore, por borë mund të ketë edhe në zona të ulëta në veri, verilindje, lindje dhe juglindje të Shqipërisë. Reshje të dendura bore priten edhe në veriperëndim të Maqedonisë së Veriut, kurse në jugperëndim ato mund të përzihen në shi. Reshje të mëdha bore priten në zonat malore të të gjitha rajoneve që i përmendëm, prandaj rekomandohet kujdes i shtuar. Shtresa të mëdha bore do të krijohen në malet e Shqipërisë, Maqedonisë së Veriut, por edhe Kosovës.
Pra, kemi të bëjmë me një përzierje të temperaturave të ftohta nga veriu dhe të ngrohta nga Mesdheu, prandaj parashikimi krejtësisht i saktë për rajone të caktuara është jashtëzakonisht i vështirë, sepse një ndryshim i vogël i temperaturave bënë ndryshimin nga shiu në borë ose anasjelltas. Në përgjithësi e Hëna në gati të gjitha ultësirat përpos bores eventuale afatshkurtër në disa zona pritet që gjatë dites të paraqiten reshje shiu, kurse natën e ardhshme prapë reshje bore sidomos në shumë zona të Kosovës.
Nga e marta do të jetë më ftohtë dhe me më shumë gjasa për reshje të herëpashershme, lokale kryesisht bore./MeteoBallkan
