Shtetet e Bashkuara të Amerikës janë goditur nga stuhi të fuqishme dimërore dhe temperatura ekstremisht të ulëta arktike. Skena të shumta dimërore kemi pa në Uashington, Nju Jork. Nju Xhersi, Çikago etj ku liqene të tëra janë ngrirë tërësisht dhe trashësi të mëdha dëbore kanë përfshirë këto metropole botërore.
Gjatë ditëve të ardhshme në Amerikë dhe Kanada pritet kulminacioni i të ftohtit arktik për arsye se një pjesë e ajrit të rrethit polar është dislokuar në atë rejon të globit. Pjesa tjetër e ajrit ekstrem të ftohtë të rrethit polar është dislokuar në Euroazi dhe Siberi dhe kjo masë ekstreme e ftohtë ajrore tani është drejtuar në drejtim të Skandinavisë dhe Britanisë së Madhe.
Britania e Madhe njihet për klimë të butë gjatë dimrit për shkak të fronteve të vazhdueshme nga Atlantiku, por ditët e ardhshme do të ndodhë e “kundërta e normales” në klimën e Britanisë së Madhe. Në drejtim të Britanisë së Madhe do të fillojnë të fryjnë erëra të akullta lindore të cilat do të kushtëzojnë edhe reshje bore, vende-vende të dendura. Borë pritet edhe në Londër por jo në sasi të mëdha. Temperaturat do të shënojnë ulje të theksuara, por jo sikur në Skandinavi ku pritet i ftohtë ekstrem.
Borë e dendur pritet edhe në Gjermaninë veriore, Holandë, Belgjikë, Poloni, Çeki e deri në Ukrainë.
Në anën tjetër rajoni ynë do të gjendet nën ndikimin e masave mjaft të ngrohta ajrore me origjinë nga Mesdheu dhe Afrika veriore. Nga e hëna priten edhe reshje shiu, erëra të fuqishme jugore dhe rrebeshe lokale me vetëtima dhe bubullimë. Pas datës 10 Shkurt nuk përjashtohet mundësia e një goditje dimërore edhe te ne, por kjo njëherë për njëherë mbetet vetëm një sinjal i pamjaftueshëm ende për të dhënë një parashikim./Meteoballkan
