Një front i fuqishëm i ftohtë ajror pritet të shkaktojë destabilizim të atmosferës sidomos në Kosovë, Maqedoninë Veriore dhe Luginën e Preshevës.
Pas paraditës dhe mesditës së ngrohtë dhe me zagushi pasdite dhe në mnrëmje priten zhvillime të fuqishme konvektive të vranësirave të cilat kushtëzojnë rrebeshe lokale shiu me vetëtima dhe bubullimë. Të gjithë e dimë natyrën e reshjeve pranverore dhe verore, pra një rajon mund të përmbytet përderisa rajoni tjetër jo shumë larg përfiton shumë pak ose hiç fare reshje, megjithatë kësaj radhe priten reshje më të zgjeruara dhe më përfshirëse. Më pak reshje sot priten në jugperëndim të Kosovës, ndërsa më së shumti rrebeshe shiu priten në Karadak, Gollak, pjesë të Llapit, Anamoravës dhe Mitrovicës me rrethinë. Rrebeshe të fuqishme priten edhe në Luginën e Preshevës dhe shumë pjesë të Maqedonisë së Veriut. Shumica e territorit të Shqipërisë do të mbetet pa reshje.
Rrebeshe shiu priten edhe nesër në Kosovë dhe disa pjesë të rajonit, ndërsa të shtunën përmirësim i përkohshëm i motit./Meteoballkan
