Pas një paraditeje dhe mesdite shumë të nxehtë dhe kryesisht të kthjellët pasdite në disa rajone në Kosovë priten zhvillime të vranësirave të cilat do të kushtëzojnë rrebeshe të izoluara por potencialisht të fuqishme shiu me vetëtima, bubullimë dhe mundësi edhe për breshër. Rrebeshet e shiu kanë filluar në rajon si psh. në Bosnjë, Mal të Zi dhe Serbi dhe ka tendenca edhe në Kosovë për zhvillime lokale të vranësirave.
Gjatë orëve të ardhshme sipas të gjitha gjasave do të ketë zhvillime por, normalisht nuk duhet pritur reshje në tërë territorin vetëm vende-vende. Për shkak të temperaturave mjaft të larta dhe ajrit të paqëndrueshëm ekziston mundësia që ndonjë rajon të ketë ndonjë super-stuhi të përcjellur edhe me breshër.
Sidoqoftë ato rajone në Kosovë që nuk do të përfitojnë sonte reshje do të kenë një rast gjatë ditës së nesërme sepse edhe nesër vende-vende priten rrebeshe lokale shiu me vetëtima dhe bubullimë. Për dallim nga sot nesër (e shtunë) temperaturat pritet të jenë më të këndshme. Gjithashtu ditën e nesërme përveç Kosovës rrebeshe të lokalizuara shiu me vetëtima dhe bubullimë priten edhe në disa vise të Shqipërisë dhe veçanërisht Maqedonisë së Veriut./Meteoballkan
