Edhe sonte gjatë natës do të kemi minusam por nga dita e nesërme në shumicën e territoreve të rajonit tonë vjen ngritja e temperaturave. Një vorbullë e dobët ciklonike do të depërtojë sonte dhe nesër në rajonin tonë duke kushtëzuar reshje lokale të dobëta shiu në ultësira dhe bore në viset malore.
Pastaj do të kemi fuqizimin e anticiklonit me qendër në Afriken veriore dhe Spanjë. Ky anticiklon do të ndikojë në ngritjen e mëtutjeshme të temperaturave sidomos nga fundjava. Bora do të shkrihet në shumë rajone, me përjashtim të viseve të larta malore. Reshje atmosferike nuk pritet të ketë shumë, vetëm pak dhe lokalisht dhe atë në Shqipëri ku priten reshje shiu dhe në Kosovë ku mund të kemi reshje të dobëta dhe të përziera. Në anën tjetër gjithashtu do të kemi depërtimin e masave ajrore edhe nga Atlantiku të cilat së bashku me anticiklonin e Afrikes Veriore do të ndikojnë në ngritjen e temperaturave. Sipas ecurive aktuale sinoptike kjo gjendje do të vazhdojë deri ditën e martë kur pritet që një frontë i fuqishëm i ftohtë ajror të depërtojë në rajonin tonë duke kushtëzuar reshje të dendura shiu por edhe reshje kalimtare bore si dhe ulje të sërishme të temperaturave./Meteoballkan.
