Pas kalimit të cikloni në lindje të Kontinentit është hapur rruga për depërtimin e masave të ftohta ajrore me origjinë polare. I Ftohti nuk do të jetë ekstrem, por krejtësisht i natyrshëm për këtë periudhë kohore. Priten erëra të ftohta veriore.
Reshjet atmosferike kanë pushuar në shumicën e rajonit tonë dhe në vazhdim priten reshje sporadike bore në disa vise të Kosovës. Erërat do të vazhdojnë të fryjnë nga veriu duke ulur edhe më tutje temperaturat.
Edhe ky depërtim i ajrit të ftohtë arktik nuk do të zgjasë shumë sepse nga dita e premte një ciklon i ri nga Atlantiku do të zbarkojë në Britani dhe Italinë veriore. Si pasojë do të fillojnë të ngriten temperaturat menjëherë tek ne pra, nga e Premtja kur priten reshje të reja shiu pasdite vonë ose në mbrëmje, vende-vende intensive por kalimtare.
Për fundjavë një ciklon edhe më i fuqishëm do të zbarkojë nga Atlantiku duke sjellë herë pas here reshje të reja shiu e bore në viset kodrinore-malore. Krejt në fund të javës dhe fillim të javës tjetër kemi gjasa për reshje të reja bore./Meteoballkan