Mbi rajonin tonë po mbizotërojnë masa mjaft të ngrohta ajrore me origjinë nga Afrika Veriore, ndërsa masat mjaft jo stabile ajrore nga Atlantiku po “mundohen” të depërtojnë gjithashtu.
Më gjerësisht në rajon atmosfera është jashtëzakonisht jo stabile duke filluar nga Sllovenia, Kroacia, Bosnja dhe Hercegovina, Serbia etj ku lokalisht ka zhvillime të fuqishme të vranësirave konvektive të cilat po kushtëzojnë rrebeshe lokale por shumë të fuqishme shiu me vetëtima, bubullimë dhe breshër të madh. Në Kroaci (Adriatikun verior) sot më herët ishte zhvilluar një stuhi mjaft e fuqishme dhe kishte arritur shkallën e ashtuquajtur “overshooting top” nga ku mund të pasojnë procese shumë të bujshme atmosferike siç janë breshëri, erërat e rrezikshme dhe tornadot, megjithatë stuhia nga bregdeti u dobësua posa iu afrua tokës kroate ku pati reshje të dendura shiu dhe rrebeshe lokale me vetëtima, bubullimë dhe breshër.
Edhe në Kosovë pritet aktivizim i atmosferës por në një shkallë të dobët, megjithatë vende-vende ka mundësi që përpos rrebesheve të shiut me vetëtima dhe bubullimë të ketë edhe breshër. Zhvillimet pritet të jenë të karakterit lokal dhe kështu që shumë rajone nuk do të preken fare. Rrebeshe të fuqishme lokale shiu priten në juglindje dhe veri të skajshëm të Shqipërisë si dhe në shumë pjesë të Maqedonisë së Veriut.
Kjo do të jetë një “hyrje” e destabilizim të motit sepse nga nesër e tutje priten zhvillime të shpeshta të vranësirave konvektive të cilat do të sjellin reshje shiu dhe rrebeshe lokalisht të fuqishme shiu me vetëtima, bubullimë dhe mundësi edhe për breshër.
Temperaturat nga vikendi do të shënojnë ulje, por në shumë rajone herë pas here do të jetë mjaft zagushi./Meteoballkan
