Një valë reshjesh të dendura shiu përfshiu gjatë natës shumë pjesë të Kosovës, ndërsa në Shqipëri lokalisht pati edhe përmbytje për shkak të reshjeve intensive, por reshjet ende nuk janë gjithëpërfshirëse.
Sot kemi pauzë të reshjeve dhe do të vazhdojnë alternimet mes vranësirave e intervaleve kohore me diell, gjithnjë me mundësi për reshje të herëpashershme lokale shiu e po ashtu edhe rrebeshe me mundësi për ndonjë vetëtimë dhe bubullimë. Po ashtu edhe gjatë natës që po vjen do të ketë kthjellime të pjesshme.
Temperaturat nuk po shënojnë ulje për shkak se ne gjendemi në sektorin e ngrohtë të masave ajrore ciklonike dhe për këtë arsye reshje janë në formë të shiut. Reshje bore mund të ketë vetëm në viset më të larta malore, ndërsa të dielën dhe të hënën priten edhe në disa vise paksa më të ulëta, por ende pa borë nëpër ultësira.
Reshjet e shiut rikthehen pasditen e së premtes në gati tërë rajonin, vende-vende mjaft intensive sidomos në Shqipëri, por lokalisht edhe në viset tjera. Pas reshjeve të së premtën mbrëma pason një pauzë e shkurtër për tu kthyer përsëri gjatë fundjavës për shkak të ardhjes së vazhdueshme të masave ajrore ciklonike.
Pra, para nesh një periudhë me reshje solide atmosferike kryeissht në formë shiu. Ndonjë goditje e fortë dimërore ende nuk shihet në horizont./MeteoBallkan
