Nesër dhe pasnesër (e enjte, e premte) presim përmirësim të kushteve të motit. Të premten edhe rritje të temperaturave , (megjithatë priten reshje lokale shiu) për shkak të ardhjes së ajrit të ngrohtë para-frontal. Në mbrëmje vonë ose mëngjesin e hershëm të së shtunës nga veriu presim frontin masiv të ftohtë ajror i cili vjen në veri të Kosovës sipas të gjitha gjasave pas mesnate, por mund të ndodhë edhe deri në orët e hershme të mëngjesit të së shtunës.
Fillimisht reshje shiu e pastaj shumë shpejtë reshje shqote e bore të shoqëruara me erëra të ftohta nga veriu. Reshjet së pari do të fillojnë në veri të Republikës së Kosovës dhe veri të Malit të Zi. Shumë shpejtë këto reshje do të shtrihen në tërë territorin e Republikës së Kosovës dhe verilindje të Shqipërisë.
Në viset tjera ende pa reshje ose reshje shiu. Njëkohësisht në këtë moment në jug të Detit Adriatik do të krijohet cikloni i fuqishëm i cili do të fuqizohet dhe thellohet duke udhëtuar shpejt drejt Detit Egje dhe Detit të Zi. Në këtë kohë presim intensifikim të reshje të borës në Kosovë (e shtunë) dhe fillimin e reshjeve të borës në Maqedoninë Veriore dhe lindje të Shqipërisë. Me kalimin e ciklonit në drejtim të Detit Egje dhe Detit të Zi do të ketë potencial për stuhi të fuqishme bore në shumë pjesë të Ballkanit e sidomos në Bullgari, Maqedoninë Veriore dhe Kosovë e Shqipëri. Njëkohësisht temperaturat do të shënojnë ulje të ndjeshme dhe erërat e ftohta dhe të forta nga veriu do të kushtëzojnë kushte klasike dimërore.
Sa i përket Shqipërisë mesdhetare mund të ndodhë ndonjë reshje afatshkurtër bore në disa zona, por kjo mbetet të shihet.
Në gati tërë territorin e Republikës së Kosovës dhe Maqedonisë së Veriut do të krijohen shtresa bore të cilat mund të jenë të qëndrueshme disa ditë por kjo do të varet nga ecuria sinoptike pas ciklonit.
Pra në fund të themi se bora po vjen dhe temperaturat polare po ashtu. Ende do të ketë ndryshime në modele sa i përket sasisë së borës, prandaj edhe kësaj radhe nuk po përmendim asgjë në këtë aspekt por gjasat janë më se reale që të kemi një ambient plotësisht të bardhë në fundjavë si në viset kodrinore-malore po ashtu edhe nëpër ultësira. Përjashtim normalisht mund të bëjnë viset bregdetare/mesdhetare- Ultësira perëndimore e Shqipërisë./MeteoBallkan
