Cikloni i fuqishëm në këto momente po rrugëton nga Deti Adriatik mespërmes Gadishullit Ballkanik në drejtim të Rumanisë apo Karpateve. Lagështia e këtij cikloni përsëri nuk favorizon reshje të dendura të shiut tek ne, ndërsa krejtësisht e kundërta po ndodh në Serbi, Bosnjë dhe Hercegovinë dhe Rumani. Në Bosnjë dhe Hercegovinë natën e kaluar pati reshje të dendura shiu të cilat po vazhdojnë edhe sot, kurse në Serbi në këto çaste ka rrebeshe të fuqishme shiu me vetëtima, bubullimë dhe breshër.
Në Kosovë dhe pjesën më të madhe të Shqipërisë reshjet ishin më të pakta, kurse në shumë rajone pati vetëm reshje simbolike. Edhe gjatë ditës së sotme vazhdon avazi i njëjtë me disa përjashtime. Reshje të fuqishme priten në Bosnjë dhe Hercegovinë, Serbi dhe Mal të Zi ku ekziston potencial edhe për vërshime, kurse në viset tjera të rajonit priten reshje të izoluara shiu me ndonjë vetëtimë dhe bubullimë. Në shumë pjesë të rajonit posaqërisht në territoret tona nuk do të ketë fare reshje. Ky ciklon i cili do të stacionohet në Malet e Karpateve në Rumani do të vazhdojë të ndikojë në motin në rajonin tonë edhe ditën e nesërme, ku herë pas here priten reshje shiu, ndërsa në viset malore edhe reshje bore. Nuk priten reshje të mëdha atmosferike tek ne./Meteoballkan
