Shumë pjesë të Evropës po përjetojnë një dimër mjaft të ftohtë dhe me reshje të dendura bore pas disa dimrave shumë të butë të viteve të shkuara. Reshje të fuqishme bore kishte gjatë këtij dimri që nga Spanja në jugperëndim, Britania e Madhe në veriperëndim, pastaj Franca, Gjermania, Zvicra e shumë pjesë tjera të Kontinentit evropian. Reshje të dendura bore pati edhe në Ballkan e më së shumti në Bosnjë dhe Hercegovinë dhe Serbinë jugore. Këto reshje të dendura bore ishin afruar deri të kufirit të Kosovës, por masa ajrore e ngrohtë nga Mesdheu i ktheu ato në reshje të fuqishme shiu, shiu të akullt e shqotë.
Sidoqoftë, këtë artikull po ia kushtojmë Evropës e sidomos Zvicrës dhe Gjermanisë jugore ku masa të reja ciklonike nga Atlantiku në kontakt me ajrin e ftohtë arktik do të kushtëzojnë reshje të reja të dendura bore këto ditë. Reshje shumë të fuqishme bore priten sidomos në disa zona të Zvicrës (jo në krejt territorin) dhe Gjermanisë Jugore. Këto zona edhe në këto momente kanë shtresa të mëdha bore dhe reshjet e reja mund të vështrësojnë qarkullimin./Meteoballkan
