“Risi” e ka cilësuar vendosjen e semaforëve në Komunën e Vitisë, nënkryetari i kësaj komune, Hasan Aliu. Në një paraqitje në emisionin SOT teksa ka numëruar punët e kësaj komune në kohë pandemie, Aliu ka theksuar vendosjen e semaforëve.
Duke thënë se krerëve të komunës i është dashur angazhim shtesë në një kohë të përballjes me pandeminë, Aliu ka thënë se vendosja e semaforëve do t’u ndihmojë nxënësve të kësaj komune për lëndët mësimore.
“Ne nuk jemi ndalur edhe pse ishim komuna e parë e prekur me koronavirus. Megjithatë, u desh që stafi politik në krye me kryetarin për punë shtesë, pos marrjes për parandalimin e virusit është dashur të zhvillohen edhe projekte të tjera. Të gjitha projektet e parapara për vitin 2020, i kemi zhvilluar dhe përfunduar me sukses. Për kryerjen e këtyre punimeve është dashur angazhim shtesë. Risi ka shumë në Komunën e Vitisë. Ka projekte të zhvilluara faza-fazë. Po filloj nga shëtitorja që shumë Komuna ia kanë lakmi Komunës së Vitisë. Derisa lumi Morava ka qenë fatkeqësi, sot e kemi hapjen e lumit dhe shëtitoren që e shfrytëzojnë qytetarët për ecje të lirë. Ajo që vlen për ta theksuar është që jemi në përfundim të rrumbullakimit të objekteve shkollore në të gjithë Komunën. Së shpejti pritet edhe lëshimi i çerdhes së dy të publike, në Pozharan. Krejt këto janë risi që qytetarët s’i kanë pasur më herët. Por sot kemi edhe sheshin. E gëzojnë të gjithë qytetarët. Ajo që është risi, është që për herë të parë fëmijët e qytetit të Vitisë do të ballafaqohen edhe me semaforë që deri tash ishte mungesë në këtë komunë. Do të ndikojë edhe te lëndët mësimore për fëmijët se si të veprojnë e si duken ata”, ka thënë ai.