Cikloni i cili pritet të formohet dhe fuqizohet në Mesdhe do të rrugëtojë nga jugu i Italisë në drejtim të Greqisë duke sjellur reshje intensive edhe në Kosovë. Reshjet do të jenë jashtëzakonisht të mirëseardhura pas thatësisë mjaft të gjatë në trojet tona.
Reshje mjaft intensive shiu e bore pritet të përfshijnë shumë pjesë të Republikës së Kosovë sidomos të enjten vonë dhe mëngjesin shumë të hershëm të së premtes. Sasia e reshjeve do të jetë solide për ta larguar thatësinë përfundimisht nga Kosova, por reshje edhe më të mëdha priten në pjesë të Greqisë, Bullgarisë dhe Rumanisë ku mund të ketë edhe vërshime masive.
Reshje shiu dhe rrebeshe vende-vende intensive do të ketë edhe në shumë pjesë të Shqipërisë, Maqedonisë së Veriut dhe Luginës së Preshevës, ndërsa veriu i Malit të Zi do të “bllokohet” nga reshjet e dendura të borës. Reshje të dendura bore priten edhe në malet e Republikës sonë të Kosovës, por edhe në veriperëndim të Maqedonisë së Veriut. Reshje bore do të ketë edhe në veri dhe verilindje të Shqipërisë.
Stuhi të fuqishme dhe shtrëngata të fuqishme shiu me breshër pritet të përfshijnë shumë pjesë të Greqisë, ngase cikloni ka energji të madhe dhe ka shtrirje shumë të madhe në Evropen juglindore.
Sasia e reshjeve do të korrigjohet edhe gjatë ditës së nesërme dhe pastaj do të dalim me postim, ndërsa interesante është se menjëherë pas këtij cikloni pritet edhe një tjetër front i ftohtë ajror me reshje të reja shiu që do të vjen të dielën dhe të hënën nga veriperëndimi i rajonit. Pra, kemi një ndryshim në parashikim sepse për fundjavë ishte paraparë përmirësim i motit, megjithatë përmirësimi do të jetë shumë i shkurtër sepse të dielën-hënën priten reshje të reja shiu.
Pra, pritja e qytetarëve për reshje shiu do të merë fund sepse reshjet po vijnë dhe atë mjaft solide. Për shkak të intensitetit të lartë të reshjeve mund të ketë vërshime të shpejta afatshkurtra.
Pas periudhave të gjata thatësie dhe nxehtësie radha është të shijojmë një periudhë mjaft të ftohtë vjeshtore dhe dimërore me reshje të dendura atmosferike.
Informacione tjera gjatë ditës së Mërkurë./MeteoBallkan
