Në këto çaste ende jemi nën ndikimin e masave të ndryshme ajrore të cilat po kushtëzojnë mot të ndryshueshëm.
Mbi Detin e Zi dhe Evropën lindore gjendet një ciklon, ndërsa në Mesdheun perëndimor kemi anticiklonin e nxehtë i cili mundëson depërtimin e masave të nxehta ajrore drejt Evropës. Në njërën anë kemi depërtimin gradual të këtyre masave të nxehta edhe në rajonin tonë, por njëkohësisht kemi ndikimin e ciklonit nga lindja i cili po shkakton stuhi të izoluara dhe shi tek ne në viset kontinentale.
Edhe nesër (e diele) gjendja pritet gati e njëjtë, vetëm se ajri i ngrohtë do të fillojë të përparojë e njëkohësisht nga lindja do të vazhdojë të vijnë copëza të ajrit të lagshtë dhe kombinimi i këtyre faktorëve do të shkaktojë stuhi të izoluara me vetëtima bubullimë dhe breshër. Reshjet nuk do të jenë gjithëpërfshirëse, pra kjo vlenë vetëm për disa rajone në viset tona kontinentale si në disa pjesë të Kosovës, perëndim të Maqedonisë së Veriut, Luginën e Preshevës dhe veriun e Malit të Zi. Në bregdet si në Shqipëri, po ashtu në Mal të Zi vazhdon dhe dominon mot i vërtetë veror.
Të hënën masat ajrore të nxeta përparojnë dhe fuqizohen edhe më shumë në rajonin tonë duke rritur temperaturat, megjithatë ende do të ketë gjasa për zhvillimin e stuhive të izoluara, por të fuqishme.
Nga e marta ajri afrikan “pushton” plotësisht rajonin tonë dhe në shumicën absolute të vendeve tona pritet mot me diell dhe shumë i nxehtë. Priten edhe koncentrime të pluhurit të Shkretëtirës së Saharasë Afrikane në atmosferë dhe ndoshta edhe në sipërfaqe. Ende do të ketë gjasa për zhvillime të izoluara të ndonjë stuhie në ndonjë rajon kontinental.
Vera e vërtetë po vjen me temperatura mbi 30 gradë Celsius gjatë javës, ndërsa në disa rajone ajo mund të arrijë deri në 40 gradë Celsius si në Shkup, por mundësia për 40 gradë Celsius nuk përjashtohet edhe në Dukagjin.
Kulminacioni i valës së fuqishme të nxehtësisë pritet të mërkurën dhe të enjtën, pastaj temperaturat mund të ulen pak por ende mbeten mbi 30 gradë Celsius që do të thotë se vala e nxehtësisë tropikale pritet të zgjasë më shumë se 5 ditë./Meteoballkan
