Rrugët e kryeqytetit të Kosovës, janë vërshuar në pasditen e së dielës, si pasojë e një shiu të rrëmbyeshëm. Situatë më kritike është raportuar në lagjet Bregu i Diellit dhe Mati.
Komuna e Prishtinës ka njoftuar se ekipet emergjente janë në teren, bashkë me zjarrfikësit, për të sanuar gjendjen.
Derisa ajo apelon te qytetarët që të qëndrojnë në shtëpi.
“Të dashur qytetarë, për shkak të shiut të rrëmbyeshëm që ka shkaktuar dëme në kryeqytet, ju lutemi qëndroni në shtëpi ose në zona të sigurta nëse jeni jashtë shtëpisë.
Ekipet e Drejtorisë për Siguri dhe Emergjenca , si dhe zjarrfikësit , janë në terren duke punuar pa ndërprerje për të sanuar gjendjen.
Për çdo problem, telefononi në numrat kujdestarë (pa pagesë) 080012233 dhe 080012244.
Faleminderit për mirëkuptimin dhe kujdesin tuaj!”, shkruan Komuna e Prishtinës.
Reshjet e shiut kanë bërë që edhe energjia elektrike të ndërpritet në disa lokacione.
