Modelet globale kompjuterike për parashikim të motit gjithnjë e më shumë po i rrisin gjasat për reshje të dendura shiu në Kosovë javën e ardhshme. Ky është një lajm jashtëzakonisht i rëndësishëm sepse situata e përgjithshme e ujit dhe pendave në Kosovë nuk është aq e mirë dhe kjo krizë e ka zanafillën tek mungesa e reshjeve të bollshme të borës por edhe të shiut që nga muaji Shkurt e tutje.
Edhe pse është ende herët për analiza përfumdimtare trendi i modeleve është mjaft optimist sepse dy modelet kryesore globale kompjuterike për parashikim të motit parashohin depërtimin e masave të fuqishme të lagështa dhe të ftohta ajrore nga Atlantiku verior në drejtim të Evropës dhe Ballkanit. Gjithashtu do të kemi edhe vorbullën ciklonike (të mërkurën mbrëmje dhe natën) e cila përmes Detit Adriatik do të kalojë pikërisht mbi territoret tona duke sjellur lagështi dhe të reshura të dendura atmosferike. Këto reshje do të jenë si flori për shumë pjesë të rajonit tonë të cilat po vuajnë nga thatësia. Reshje priten edhe në Shqipëri nga e mërkura në mbrëmje dhe të enjtën. Na mbetet të shpresojmë që të mos ketë ndonjë ndryshim drastik në parashikimet e modeleve dy ditët e ardhshme. Detaje më të sakta do të kemi nesër dhe pasnesër./Meteoballkan
