Që nga Evropa jugperëndimore, (Spanjë, Portugali) e deri në Britaninë e Madhe rajone të tëra u goditen ditëve të fundit nga stuhi jashtëzakonisht të fuqishme me erëra uraganike deri në 150 km-h, madje në disa zona era arriti shpejtësinë deri në 200 km-h që është një ekstrem i llojit të vet.
Këto stuhi u manifestuan nga cikloni tropikal shumë i fuqishëm që erdhi nga brigjet e Shteteve të Bashkuara të Amerikes. Më të goditurat ishin Britania e Madhe dhe Franca, por edhe Gjermania, Holanda, Belgjika, Portugalia, Spanja, Italia dhe shtetet e Evropes qendrore dhe në fund edhe Gadishulli Ballkanik i cili u godit nga ciklone sekondare të krijuara në veri të Italisë dhe Mesdhe si rezultat i shtytjes së cikloneve amë nga Atlantiku. Përpos erërave të fuqishme në shumë vende pati edhe reshje të rrëmbyeshme shiu, ndërsa erërat e forta nga këto sisteme ajrore erdhën edhe në territoret tona duke sjellur reshje dhe rrebeshe lokale shiu pas një kohe shumë të gjatë thatësie dhe temperaturash të larta.
Temperaturat ende vazhdojnë të jenë të larta për shkak të rrymimeve të fuqishme ajrore nga perëndimi. Edhe pse jemi në Nëntor borë ka vetëm në majat (dhe afër tyre) e Bjeshkëve më të larta.
Ciklone të reja po vazhdojnë të arrijnë nga Oqeani Atlantik dhe po kushtëzojnë mot mjaft të paqëndrueshëm që nga Portugaliam Itali e Ballkan deri në Skandinavi dhe Rusi. Reshje bore priten në zonat Alpine dhe në Skandinavi e Rusi, ndërsa rrallëkund në ndonjë zonë të ulët mbidetare.
Edhe sot gati e tërë Evropa perëndimore deri në Itali, Ballkan dhe Evropa qendrore janë ndikimin e masave mjaft të fuqishme ciklonike dhe kështu pritet të jetë edhe ditën e diele.
Në territoret tona të dielën presim rritje të shpejtësisë së erërave dhe rrebeshe lokale shiu vonë pasdite. Goditje dimërore në Evropë nuk po pritet ende dhe aq më pak në Gadishullin Ballkanik.
Fillimi i javës së re na sjellë përmirësim të shkurtër të kushteve sinoptike, ndërsa reshje të reja priten në mes të javës së re./MeteoBallkan
