Nën ndikimin absolut të masave ajrore të thata anticiklonike edhe kjo javë do të jetë krejtësisht e thatë dhe e ngrohtë. Anticikloni afrikan është konsoliduar në Mesdheun perëndimore, qendror dhe pjesë të Evropes jugperëndimore duke sjellur mot stabil dhe shumë të ngrohtë për këtë periudhë kohore.
Vjeshta ka filluar dhe jemi në muajin Tetor dhe shumë vende evropiane po përjetojnë temperatura mjaft të larta. Vetëm në lindje të Kontinentit dhe pjesë të Skandinavisë ka ulje të ndjeshme por kalimtare të temperaturave.
Shqipëria, Kosova dhe Maqedonia e Veriut po përjetojnë një periudhë mjaft të thatë dhe me mungesë enorme të reshjeve atmosferike dhe kështu do të jetë edhe kjo javë.
Reshjet deri në fund të kësaj jave do të jenë krejtësisht të pakta dhe vetëm në disa rajone. Në shumicën absolute të territoreve tona nuk do të ketë reshje, megjithatë kjo do të ndryshojë ditën e fundit të javës, gjegjësisht të dielën kur fillon të shembet anticikloni afrikan dhe fronti së bashku me masa të fuqishme ciklonike përfshinë Malin e Zi dhe veriun e Shqipërisë, për tu zgjeruar pastaj në fillim të javës së re edhe në Kosovë dhe Maqedoninë Veriore si dhe në pjesët tjera të Shqipërisë dhe në Luginën e Preshevës.
Temperaturat deri të hënën në Kosovë mbi 25 gradë Celsius, ndërsa në Shqipëri edhe deri në 29 apo 30 gradë Celsius, ndërsa ato minimale nga 5 deri në 10 gradë Celsius.
Deri të hënën kënaquni me mot pothuajse (plotësisht) stabil, me rreze të shumta diellore dhe temperatura që sa vijnë e rriten.
Të dielen ende shumë ngrohtë, ndërkohë që fronti i fuqishëm afrohet nga veriperëndimi dhe perëndimi. Reshjet fillojnë në Mal të Zi dhe veri të Shqipërisë. Të hënën reshje në shumë pjesë të Shqipërisë, Kosovës dhe Maqedonisë së Veriut.
Për intensitetin dhe kohëzgjatjen e reshjeve ende herët të flitet me saktësi të lartë, prandaj duhet të presim edhe pak./METEOBALLKAN
