Pas shumë ditëve dhe javëve me reshje dhe me depërtime e zhvillime të shpeshta të masave ajrore ciklonike tani radhën e kanë masat ajrore të fuqishme anticiklonike që do të zhvillohen në Mesdhe, Evropen qendrore dhe Ballkan duke siguruar disa ditë stabile dhe pa reshje atmosferike.
Ky është një lajm i mirë sidomos për rajonet e prekura nga reshjet e dendura të ditëve të fundit dhe ndoshta edhe kryerjen e punimeve të mbetura bujqësore të fundit të vjeshtës, të prolonguara nga reshjet e fundit.
Por, ky nuk është i një lajm fare i mirë për dashamirët e dimrit dhe entuziastët e dordolecave.
Masat ciklonike ende prezente në viset tona po kushtëzojnë vranësira e reshje të dobëta lokale dhe këto masa ajrore do të vazhdojnë të jenë prezente edhe sot dhe nesër, pastaj vjen fuqizimi gradual por i sigurt i masave ajrore mjaft stabile anticiklonike.
Këto masa ajrore janë edhe të ngrohta, ngase do të vijnë nga Mesdheu dhe Atlantiku, megjithatë gjatë ditëve stabile disa rajone mund të mos i shijojnë temperaturat që priten të jenë relativisht të larta për shkak të mundësisë së krijimit të mjegullës ose ndoshta vranësirave të ulëta. Këto inverzione të temperaturave ndodhin shumë shpesh gjatë ditëve të shkurtra të dimrit dhe edhe pse moti dhe atmosfera stabile rajonet nën mbretërimin eventuale të mjegullës nuk do të mund të shijojnë temperaturat ditore dhe rrezet diellore, por kjo nuk mund të parashikohet saktë nga tani, prandaj mund të ndodhë që mesdita të jetë me diell në të gjitha viset gjatë mbretërimit të këtij anticikloni.
Pra, pas shumë ditëve me erëra lokale dhe reshje të shpeshta radhën e kanë ditët shumë më të qeta dhe stabil si dhe pa reshje atmosferike. Këto ditë dillojnë gjatë javës së re.
Sipas parashikimeve aktuale të modeleve globale kompjuterike për parashikim të motit reshje bore nuk priten në pjesën e parë të Dhjetori dhe janë diskutabile për pjesën e dytë të Dhjetorit.
Edhe Evropa po përjeton një rritje të temperaturave pas reshjeve të borës të ditëve të fundit dhe kjo vjen nga fuqizimi i erërave perëndimore në Atlantik. Këto erëra sjellin temperatura më të larta në Evropë dhe po ashtu sjellin nxehtësinë e Rrymës së Golfit, prandaj këto masa ajrore do të ndikojnë edhe në Ballkan.
Vetëm mjegulla eventuale mund të na “prish punë” gjatë javës së ardhshme./MeteoBallkan
