Kosova gjendet plotësisht e mbuluar nga vranësira të dendura të cilat po kushtëzojnë reshje shiu, shqote e bore, varësisht nga rajoni në rajon. Në orët në vazhdim shkurtimisht pritet intensifikim i reshjeve, por pasdite reshjet do të pushojnë dhe në mbrëmje pritet kthjellim i pjesshëm i motit.
Sistemi i vranësirave gjendet pikërisht mbi Kosovë me kulminacionin e reshjeve (shkurtimisht) gjatë orëve në vazhdim ku në disa rajone priten të vazhdojnë “shkundjet e furishme të plakave” siç njihet bora e pranverës në zhargonin popullor. Menjëherë nga nesër do të fillojë rritja e temperaturave, por mbetet mot me vranësira, intervale kohore me diell dhe reshje të herëpashershme shiu. Rritja e temperaturave do të ndjehet sidomos nga dita e premte.
Ky sistem vranësirash na solli mjaft bereqet me reshje shiu e bore dhe mbetemi vetëm të shpresojmë që gjatë natës moti të mos kthjellohet plotësisht dhe në këtë mënyrë të shpëtohen pemët dhe kulturat e ndryshme bujqësore nga dëmet eventuale. Shpresat janë të mëdha që ngricat do të jenë sporadike dhe nuk do të përfshijnë shumë pjesë të territorit sepse priten vranësira të cilat konsiderohen shpëtim nga ngricat e dëmshme, por rajoni më i rrezikuar pritet të jetë veriu i Kosovës me rrethinë ku kthjellimi i motit mund të zgjasë më shumë dhe të ketë ngrica lokale./MeteoBallkan