Gjendja sinoptike në Evropë është mjaft interesante me masat e ngrohta ajrore që kanë depërtuar në jug dhe lindje dhe masat e ftohta nga Atlantiku që po depërtojnë në Evropen perëndimore duke lëvizur në drejtim të jugut dhe lindjes.
Po ashtu edhe edhe presione të ulëta atmosferike që formohen dhe më i fuqishmi do të jetë mbi Itali duke sjellur rrebeshe të fuqishme shiu atje, ndërsa sistemet gradualisht afrohen edhe viseve tona.
Në zonat ajrore ku ndeshen temperaturat e ngrohta dhe të ftohta kemi krijimin e një sistemi të fuqishëm frontal ku krijohen jo-stabilitetet më të fuqishme atmosferike.
Ky sistem masiv frontal sot gjendet diku në Afriken veriore dhe shtrihet deri në Detin e veriut lartë në Evrope, ndërkohë që reshjet më të fuqishme nga ky sistem masiv do të përjetojë Italia veriore dhe e sidomos ajo veriperëndimore, Franca juglindore dhe Zvicra.
Para masave frontale është ngrohtë, ndërsa pas këtyre masave dukshëm më freskët.
E Enjta dinamike për Dukagjinin
Gjatë ditës së Enjte një pjesë të këtij sistemi masiv që lëviz nga perëndimi në lindje do të përfshijë Gjermaninë, ndërsa pjesa tjetër më vonë edhe viset tona. Fillimisht në Shqipëri (nga qendra në veri) orëve të vonshme të pasdites dhe Dukagjin të Kosovës do të ketë destabilizim të fuqishëm para-frontal me rrebeshe lokale, por mjaft intensive shiu me vetëtima dhe bubullimë. Pastaj, në mbrëmje vonë vjen edhe sistemi frontal po ashtu me rrebeshe intensive shiu me vetëtima dhe bubullimë që nga Dukagjini do të përfshijë edhe pjesët tjera të Republikës së Kosovës.
Sipas modeleve reshje dhe rrebeshe intensive priten sidomos në Dukagjin, lokalisht edhe në viset tjera dhe kjo mund të ndryshojë pak a shumë.
Pas frontit do të ketë ulje të lehta të temperaturave të Premten dhe gjatë fundjavës pritet mot më stabil, me intervale me diell, por edhe me mundësi për reshje të izoluara./MeteoBallkan
