Fillimi i vitit 2021 solli mot më të qetë dhe kryesisht stabil, pas disa ditëve me erëra të forta jugore dhe reshje të dendura shiu të cilat quan në përmbytje në zonën e Dukagjinit dhe disa rajone në Shqipëri.
Përkohësisht jemi nën ndikimin e një mase stabile ajrore anticiklonike dhe për këtë arsye sonte gjatë natës dhe nesër orëve të hershme të mëngjesit nëpër disa lugina të Kosovës mund të ketë mjegull të dendur, por kjo mjegull nuk do të jetë e qëndrueshme sepse nga Mesdheu na vijnë masa të reja jo-stabile ajrore duke filluar nga nesër kur do të kemi fuqizim të erërave jugore dhe juglindore të cilat do të shpërbëjnë mjegullën eventuale menjëherë. Erërat gjatë ditës së nesërme pritet të jenë të fuqishme në rajonin e Prishtinës, Gjilanit, Podujevës etj., por nuk pritet asgjë ekstreme. Nga pasnesër presim edhe reshje të herëpashershme shiu.
Ciklonet mesdhetare do të vazhdojnë të ndikojnë në motin mbi rajonin tonë gjatë pjesës më të madhe të dhjetëditëshit të parë të Janarit 2021 duke na sjellë edhe reshje shiu herë pas here dhe reshje bore në viset malore, ndërsa reshje bore nëpër ultësira mund të kemi diku afër datës 9 Janar./Meteoballkan
