Agjencia Amerikane e Hapësirës sot do të përpiqet të lëshojë me sukses robotin në Mars për të tretën herë me radhë. InSight Lander, një anije kozmike që është ndërtuar për gati dhjetë vjet dhe kushton rreth një miliardë dollarë amerikanë, do të ulet në zonën e Planetit të Kuq të quajtur Elysium Planitia.
Kjo, sigurisht, nuk do të jetë e lehtë apo rutinë. Një peshë e rëndë prej 680 kilogramësh do të hyjë në atmosferën e Marsit rreth orës 21:00 sipas kohës tonë me një shpejtësi prej rreth 19.3 mijë kilometra në orë.
lja në Mars është gjithmonë e rrezikshme, thonë shkencëtarët e NASA-s. Pjesa më e vështirë e misionit të ditës së hënë do të jetë ulja gjashtë minutëshe e automjetit që po transporton robotin.
Roboti do të gërmojë më thellë në Planetin e Kuq, sesa sondat e tjera para tij, në qoftë se shkëputja e tij nga automjeti ulës është e suksesshme.
Misioni i “InSight” në Mars mund të zgjasë të paktën dy vjet.
Të dhënat që ai do të mbledhë do të dërgohen në Tokë, ku do të studjohen nga shkencëtarët e NASA-s.
Në misionin “InSight” të NASA-s marrin pjesë edhe specialistë europianë: Gjermania është përgjegjëse për shpuesin mekanik të projektuar për të çarë pesë metra në thellësi të sipërfaqes së Marsit, për të marrë mostra dheu dhe për të matur temperaturën nëntokësore, ndërsa Franca menaxhon sizmometrin e instaluar në këmbët e robotit, që do të monitorojë tërmetet. VOA
