Sot dhe nesër rajoni ynë është nën ndikimin e masave stabile ajrore anticiklonike dhe pa gjasa të mëdha për zhvillime të rrebesheve, pra në përgjithësi na pret mot i këndshëm dhe stabil në tërë rajonin.
Temperaturat janë më së të këndshme krahasuar me ditët që lamë pas, përpos viseve mesdhetare të Shqipërisë ku është ende vapë e fortë verore.
Të premtën na pret ndryshim substancial i motit kur pritet të kemi vranësira të dendura të cilat do të kushtëzojnë reshje shiu dhe mundësi për rrebeshe të fuqishme shiu me vetëtima dhe bubullimë. Vende-vende mund të ketë rrebeshe mjaft intensive që mund të shkaktojnë probleme afatshkurtra.
Ulje të temperaturave priten edhe në viset mesdhetare të Shqipërisë dhe po ashtu edhe atje priten rrebeshe dhe shtrëngata kalimtare shiu.
Erërat do të fryjnë mesatare deri të fuqishme nga veriu, veriperëndimi dhe verilindja të cilat mund të jenë të fuqishme në kohën e shtrëngates me bubullima.
Pas shumë ditëve me temperatura mjaft të larta verore do të pasojnë disa ditë me temperatura dukshëm më të ulëta, ndërsa gjatë javes së re pritet përmirësim gradual i motit, por nuk priten temperatura shumë të larta. Ndonjë valë të re nxehtësie mund të kemi tek pas mesit së këtij muaji./MeteoBallkan
