Sot në tërë rajonin tonë po mban mot kryesisht i kthjellët, i këndshëm dhe stabil. Nxehtësia është mjaft e këndshme sepse lagështia relative e ajrit është e ulët. Temperaturat kanë shënuar ngritje solide.
Masat ajrore stabile anticklonike kanë përfshirë shumicën e territorit të rajonit tonë dhe gjithashtu kemi edhe nxehtësi por e cila nuk është aspak e rëndë sidomos në viset tona kontinentale.
Mot i ngjashëm do të mbajë edhe nesër, por do të jetë më nxehtë për disa gradë Celsius. Vranësira dhe reshje nuk priten as nesër, kurse pasnesër pasdite do të ketë zhvillime të izoluara kryesisht në viset kodrinore-malore të rajonit tonë dhe rrebeshet pritet të jenë shumë të lokalizuara apo të izoluara.
Temperaturat gjatë dy ditëve të ardhshme do të jenë të larta por nuk pritet nxehtësi e madhe. E tëra do të jetë në suaza të normales për muajin Korrik.
Krejt në fundjavë dhe fillim të javës tjetër priten ulje të temperaturave në viset tona kontinentale, pra jo në viset mesdhetare dhe bregdetare (ose shumë pak). Fronti i fundjavës dhe fillimit të javës së ardshme nuk pritet të sjellë reshje atmosferike me përjashtim të disa rrebesheve të izoluara me vetëtima dhe bubullimë./Meteoballkan
