Sot në Kosovë do të mbajë mot kryesisht me diell dhe mjaft i nxehtë. Pasdite mund të ketë edhe vranësira kalimtare, kurse në disa rajone kryesisht kodrinore-malore mund të ketë ndonjë rrebesh të izoluar shiu. Temperaturat do të kulmojnë sot ku maksimalja mund të arrijë deri në 29 apo 30 gradë celsius.
Edhe në pjesët tjera të rajonit sot do të mbajë mot mjaft i nxehtë dhe kryesisht me diell. Do të ketë edhe vranësira kalimtare. Temperaturat do të kulmojnë ku në nivel rajoni sot pritet që të arrijnë deri në 32 gradë celsius.
Të shtunën pritet të ketë ndryshim të motit. Një front i fuqishëm i ftohtë ajror nga Atlantiku do të depërtojë ne rajon duke shkaktuar destabilizim të fuqishëm të motit. Mali i Zi, Shqipëria, dhe shumë pjesë të Kosovës dhe Maqedonisë do të përfshihen nga rrebeshe lokalisht të fuqishme shiu me vetëtima dhe bubullimë. Duhet pasur para sysh se këto reshje nuk do të jenë gjithëpërfshirëse, por do të jenë tipike verore. Në shumë rajone priten rrebeshe të fuqishme, kurse mund të ketë rajone ku nuk do të ketë asnjë pikë shiu. Përjashtim mund të bëjë jugu i skajshëm i Shqipërisë i cili mund të “kursehet” nga ky sistem frontal. Priten edhe ulje të temperaturave.
Të dielën priten të kemi mot më stabil, me vranësira dhe intervale të gjata kohore me diell, ku vende-vende mund të ketë edhe riga shiu./Meteoballkan
