Një front i fuqishëm i ftohtë ajror nga veriu sot (e diele) pritet të përfshijë territorin e Republikës së Kosovës, duke kushtëzuar përkeqësim të motit me me shtim të madh të vranësirave dhe zhvillime të fuqishme të tyre të cilat pritet të kushtëzojnë reshje shiu, por edhe rrebeshe lokalisht të fuqishme shiu me vetëtima, bubullimë dhe vende-vende edhe breshër.
Gjatë paradites do të jemi ende nën ndikimin e masave relativisht të nxehta ajrore si dhe priten intervale kohore me diell, ndërsa gjatë ditës ose pasdite pritet depërtimi i frontit të ftohtë i cili do të ndjehet më së shumti me fuqizimin e përkohshëm të erërave veriore dhe verilindore. Gjatë parakalimit të frontit dhe pas kalimit të frontit do të ketë ulje të ndjeshme të temperaturave të cilat normalisht do të përcillën me reshje shiu e rrebeshe me bubullima e vende-vende edhe breshër i imët.
Fronti do të ndjehet më së shumti në Kosovë, Mal të Zi dhe veri e verilindje të Maqedonisë së Veriut si dhe në viset malore të gati tërë rajonit.
Fronti do të kalojë dhe pas kalimit të tij moti do të stabilizohet duke filluar nga e hëna, por mbeten ende temperaturat e ulëta të cilat fronti i ka tërhqur nga veriu dhe verilindja e Kontinentit. Fronti nuk do të ndikojë në bregdetin shqiptar dhe shumë vise të Shqipërisë ose ndikimi i tij do të jetë simbolik. Dy ditët e para të javës së re do të jenë shumë të freskëta sidomos nata dhe mëngjesi dhe kjo vlenë për Kosovën kontinentale, megjithatë dita do të jetë stabile me alternime mes vranësirave e intervaleve kohore me diell. Në mesjavë rritje e ndjeshme e temperaturave./MeteoBallkan
