Vetëm pak muaj pasi NASA prezantoi raketën më të fuqishme ndonjëherë në orbitë, SpaceX i Elon Musk është i përgatitur të nisë rrugëtimin e saj historik.
Fluturakja e SpaceX, e quajtur Starship, aktualisht është e vendosur në një platformë lëshimi në objektet e kompanisë në bregdetin jugor të Teksasit, përcjell Telegrafi.
Kompania synon ngritjen në orën 8:00 të mëngjesit ET (15:00 sipas kohës në Kosovë) të hënën.
“Unë mendoj se do të doja thjesht t’i vendosja pritshmëritë e ulëta”, ka thënë CEO i SpaceX, Elon Musk gjatë një ngjarjeje “Spaces” në Twitter për ndjekësit e tij të dielën në mbrëmje. “Nëse largohemi mjaftueshëm nga platforma e nisjes përpara se diçka të shkojë keq, atëherë mendoj se do ta konsideroja atë si një sukses…”.
Ai shtoi: “Ka një shans të mirë që të shtyhet pasi ne do të jemi shumë të kujdesshëm në lidhje me këtë nisje”.
Siç vënë në pah mediat, kjo do të jetë përpjekja e parë e SpaceX për të nisur një Starship të montuar plotësisht, duke u mbështetur në një fushatë testimi shumëvjeçare.
Musk ka folur për Starship – duke bërë prezantime të hollësishme rreth dizajnit dhe qëllimit të tij – për gjysmë dekade.
Ndërkohë është bërë e ditur se raketa është pothuajse 120 metra e lartë dhe është projektuar të ketë pothuajse dyfishin e “shtytjes” së çdo rakete në histori.
Madje Musk ka thënë se qëllimi i tij i vetëm për themelimin e SpaceX ishte të zhvillonte një automjet si Starship që mund të krijonte një vendbanim njerëzor në Mars.
Reklama
Për më tepër, NASA ka dhënë tashmë kontrata për SpaceX me vlerë disa miliarda dollarë për të përdorur Starship për të transportuar astronautët qeveritarë në sipërfaqen e Hënës nën programin Artemis të agjencisë hapësinore
