Ajri i ftohtë siberik do të do të përfshijë sonte rajonin tonë duke përfshirë Kosovën, por edhe Shqipërinë, Maqedoninë Veriore dhe Malin e Zi. Vetëm jugu dhe jugperëndimi i Shqipërisë do të mbesin ende relativisht të ngrohta deri të shtunën vonë pastaj pritet ulje e theksuar e temperaturave edhe atje.
Në anën tjetër nga territori i Francës do të kemi depërtimin e një cikloni në Detin Tiren afër Italisë veriore. Ky ciklon do të udhëtojë në drejtim të Italisë jugore, detit Jon e pastaj në drejtim të Greqisë duke u fuqizuar.
Kombinimi i lagështisë së këtij cikloni me ajrin e acartë siberik do të jetë një bashkëveprim perfekt për reshje të dendura bore edhe në rajonin tonë. Reshjet më të fuqishme të borës priten në Greqi, por edhe në Shqipërinë juglindore, qendrore dhe lindore. Reshje bore priten pothuajse në tërë territorin e Republikës së Shqipërisë duke përfshirë edhe Tiranën. Ka shumë gjasa që në Tiranë të krijohen shtresa bore deri në 10 cm. e ndoshta edhe më shumë. Reshje dëbore priten edhe në bregdetin shqiptar që nga jugu deri në veri. Në bregdetin e jugut dhe jugperëndimit do të ketë reshje shiu, por edhe atje ka gjasa që të shndërrohen në reshje bore.
Reshje të dendura bore priten edhe në Maqedoninë veriore dhe pjesë të Republikës së Kosovës. Më së paku reshje bore priten në veri të Kosovës duke u bazuar në ecuritë aktuale sinoptike./Meteoballkan