Stuhi të fuqishme kanë filluar në pjesë të Italisë e sidomos në veri të Italisë dhe veri e veriperëndim të Ballkanit. Pjesë të Sllovenisë po goditen nga stuhi të fuqishme shiu e breshëri, ndërsa cikloni Gjenovian vjen duke u fuqizuar edhe më shumë.
Përderisa stuhitë po afrohen territoret tona po “piqen” nga i nxehti i madh afrikan. Temperatura në Shqipëri ka arritur deri në 40 gradë Celsius, ndërsa në Kosovë 36 gradë Celsius. Në Maqedoninë Veriore 37 dhe 38 gradë Celsius. Mund të rritet edhe ndonjë gradë më lartë.
Stuhitë e forta gjatë natës do të arrijnë deri në Mal të Zi dhe Shqipëri ku orëve të hershme të mëngjesit priten rrebeshe lokalisht intensive shiu me vetëtima dhe bubullimë. Normalisht priten shkarkesa të fuqishme atmosferike. Temperaturat do të fillojnë të ulen, ndërsa Kosova pret flladin gjatë ditës së martë.
Stuhitë shumë të fuqishme që po priten në Itali dhe Slloveni gjatë orëve të ardhshme do të zhvendosen gradualisht drejt Kroacisë, Bosnjës dhe Hercegovinës, Mal të Zi dhe natën ose në mëngjes herët në bregdetin shqiptar. Loklaisht priten stuhi intensive dhe rrebeshe intensive shiu me vetëtima dhe bubullimë.
Vende-vende sidomos në veri të Italisë do të ketë potencial edhe për tornado dhe breshër masiv./METEOBALLKAN
