Orëve të pasdites do të fillojnë të fryjnë erëra të ftohta nga veriu dhe kjo shënon depërtimin gradual të masave të ftohta ajrore në Kosovë, pastaj edhe në rajon më gjerë. Reshjet e shiut do të fillojnë të shndërrohen në reshje bore fillimisht në viset malore e orëve të mbrëmjes me intensifikimin e erërave të ftohta nga veriu edhe në disa ultësira të Republikës së Kosovës.
Reshje bore priten në viset kodrinore-malore ku priten edhe shtresa jo të mëdha, ndërsa disa ultësira po ashtu do të kenë reshje bore dhe shtresa dekorative. Ultësirat e Dukagjinit vështirë që do të kenë reshje bore, por në disa vise edhe atje mund të ketë ndonjë fjollë.
Reshje bore priten edhe në veri të Malit të Zi, viset kodrinore-malore të Shqipërisë kontinentale, Maqedonisë së Veriut dhe Luginës së Preshevës. Lokalisht edhe disa ultësira do të kenë fjolla bore, por ashtu si i tërë ky dimër pa ndonjë reshje signifikante bore.
Erërat mjaft të ftohta veriore do të jenë prezente edhe gjatë ditës së enjte kur na pret një ditë mjaft e ftohtë, me reshje sporadike bore të koncentruara kryesisht në viset kodrinore-malore.
Të premten do të ketë tendencë përmirësimi, por mbetet ende ftohtë në viset kontinentale. Nga e shtuna erërat veriore do të ndalen plotësisht dhe do të pasojë përmirësimi substancial i motit./METEOBALLKAN