Rajoni ynë po vazhdon të jetë nën ndikimin e masave të thata anticiklonike të cilat po kushtëzojnë mot stabil dhe të thatë.
Anticikloni po fillon të dobësohet gradualisht dhe nga nesër presioni i ajrit do të fillojë të ulët për shkak të afrimit të një fronti të ftohtë ajror nga veriperëndimi. Ky front do të jetë mjaft i fuqishëm në Ballkanin veriperëndimor dhe disa pjesë të Ballkanit perëndimor dhe qendror, por kur të arrijë te viset tona do të jetë dukshëm më i dobësuar, megjithatë priten reshje shiu të martën si në Kosovë, po ashtu edhe në Shqipëri, Maqedoninë Veriore dhe Mal të Zi. Reshje pak më intensive priten në disa vise të Shqipërisë, Malit të Zi dhe Maqedonisë së Veriut.
Fronti dhe reshjet shihen në fotografinë kryesore të martën në mbrëmje.
Para frontit nesër do të jetë nxehtë me erëra jugore, jugperëndimore dhe juglindore, ndërsa pas kalimit të frontit të martën, gjegjësisht të mërkurën do të fillojnë të fryjnë erëra nga verilindja dhe priten ulje të temperaturave, por nuk pritet ndonjë i ftohtë që vlenë të përmendet. Në viset malore mbi 900m lartësi mbidetare mund të ketë reshje kalimtare shqote dhe dëbore.
Gjatë javës na pret mot i ndryshueshëm dhe lajm i mirë është se do të ketë përmirësim të kualitetit të ajrit sepse atmosfera do të jetë pak më dinamike për shkak të rrymimeve pak më të fuqishme ajrore, megjithatë gjatë mëngjeseve prapë herë pas here mund të ketë mjegull e cila pritet të tërhiqet gjatë paradites ose mesditës./Meteoballkan