Tërmeti që shpërfaqi varfërinë e fshatrave të Tiranës
Fshati Pezë-Helmës i Njësisë Administrative të Ndroqit, në Bashkinë e Tiranës, gjendet vetëm 12 kilometra larg kryeqytetit dhe shtrihet në anë të rrugës së vjetër Tiranë-Durrës.
Njësia Administrative e Ndroqit është një nga zonat më afër epiqendrës së tërmetit 5.8 ballë i shkallës Rihter, që goditi Shqipërinë më 21 shtator të këtij viti, shkruan sot Koha Ditore.
Kjo zonë gjendet mes Tiranës dhe Durrësit me një distancë të baraslarguar me rreth 15 kilometra nga epiqendra e regjistruar në Kepin e Rodonit. Ndërtimi strukturor në kodër, me mjete rrethanore, me gurë nga lumi, me baltë e qerpiç, me kallama e dërrasa, por edhe vjetërsia, i bënë ndërtesat e fshatit jashtëzakonisht të ekspozuara nga tërmeti i 21 shtatorit.
Një ndër shtëpitë e dëmtuara në Pezë-Helmes është edhe ajo e Vaid Memës. Bashkëshortja e Vaidit thotë se bashkëshorti i saj ishte i shtrirë në krevat në momentin kur ra tërmeti, pasi prej kohësh paraliza e ka lënë në shtrat. Më shumë mundim ajo e ka nxjerrë jashtë bashkëshortin, ku tullat e tjegullat në shtëpinë e saj përdhese vetëm me dy dhoma dhe të vjetër filluan t’i binin në trup.
Pasi dolën në oborr dhe shpëtuan, ata panë dhe kuptuan se tashmë shtëpia e tyre ku kishin lindur e rritur tre djemtë ishte bërë e pabanueshme. Por, ndërsa prindërit i strehuan në një qendër sociale në Tiranë, tre djemtë kanë ngelur në mëshirën e kushërinjve. Policia ua ka bërë të qartë se nuk mund të hyjnë më në atë shtëpi.
Një fqinj i familjes Mema thotë se banesa e Vaidit është ndërtuar në vitin 1970 me kontributin vullnetar të secilit. Arturi, djali i madh i Vaid Memës, punon në një lavazh automjetesh në anë të rrugës së vjetër Tiranë-Durrës, në fshatin e tij Pezë-Helmës. Ai tregon se me të ardhurat si lavazhier, si fillim paguan ilaçet e shtrenjta të të atit. Nuk patën kurrë shanse që të ndërtonin një shtëpi të re dhe varfërinë e tyre e ka nxjerrë akoma më zbuluar tërmeti.
“Mendoj që për pak ditë do të qëndroj te xhaxhai, për më tej nuk di, nuk di asgjë”, thotë i riu, duke e mbyllur se “I di Zoti këto punë”. Gjyshja e Arturit që jeton me xhaxhanë e tij thotë “se kështu pati ndodhur edhe dikur një tërmet i fortë, por kësaj radhe djali për pak më ngeli nën gurë”….(Më gjerësisht lexoni në Koha Ditore)
