Viteve të fundit është bërë pothuajse traditë ti presim festat e fund-vitit pa borë dhe me temperatura relativisht të larta. Normalisht kjo nuk ka ndodhur çdo vit, por është një trend gjithnjë e në rritje.
Këto ditë e shijuam pak acarin polar dhe sensin e dimrit, por kjo pritet të ndryshojë me rritjen e temperatuave gjatë kësaj fundjave.
Acar pritet edhe sonte dhe nesër në mëngjes sidomos në viset kontinentale. Nga e premta rritje progresive e temperaturave si ato minimale, po ashtu edhe ato maksimale.
Erërat jugore do të fillojnë të fuqizohen si pasojë e cikloneve nga Atlantiku që pritet të rritin temperaturat në Evropë dhe veçanërisht në Ballkan ku ato maksimalet mund të arrijnë deri 18 gradë Celsius në nivel rajoni dhe deri në 13 ose 14 në nivel të territorit të Republikës së Kosovës.
Krejt në fund të këtij viti kemi një shancë të mirë për një mini-goditje dimërore dhe reshje bore, por bazuar në ecuritë më të fundit sinoptike një goditje e fuqishme dimërore nuk duket në horizont./MeteoBallkan
