Atmosfera është destabilizuar në Kosovë dhe rajon që nga dita e pardjeshme, por stuhitë lokale ishin të izoluara, afatshkurtra dhe jo ashtu siç ishin paraparë, megjithatë në disa zona pati rrebeshe intensive dhe bubullima të zhurmshme. Gjatë ditës së djeshme një front i ftohtë ajror solli ulje më të ndjeshme të temperaturave në Kosovë dhe reshje shiu.
Dje e tërë Italia dhe viset tona ishin nën ndikimin e kësaj mase më të ftohtë ajrore, ku vende-vende pati reshje shiu. Reshjet e shiut vazhduan në shumë zona edhe dje pasdite dhe gjatë orëve të natës duke u intensifikuar herë pas here në disa zona të caktuara në formë të rrebesheve. Po ashtu edhe e shtuna në mëngjes solli reshje të herëpashershme shiu, ndërsa temperaturat do të vazhduan të jenë të ulëta.
Pasditen e së shtunën ka gjasa edhe për zhvillime të ndonjë rrebeshi të fuqishëm në rajonin e Dukagjinit dhe Anamoravës, Maqedoninë Veriore dhe disa zona të Shqipërisë kontinentale, por në përgjithësi moti do të vjen duke u përmirësuar.
Lajmi i mirë është se të dielën presim përmirësim të dukshëm të motit dhe rritje të temperaturave, megjithatë nuk do të jemi plotësisht imun ndaj disa vranësirave dhe ndonjë rrebeshi të izoluar shiu./MeteoBallkan
