Sot ishte dita më e nxehtë e këtij viti dhe temperaturat tejkaluan shifrën 30 gradë celsius edhe në Kosovë. Ngjashëm ishte edhe në rajon, bile edhe më nxehtë. Pasdite në Mal të Zi u krijua një sistem stuhie e fuqishme por e kufizuar e cila pastaj përfshiu edhe shumë pjesë të Dukagjinit, Shqipërisë veriore dhe të mesme, por edhe pjesë të kufizuara të Maqedonisë së Veriut. Stuhia u zhvillua shumë më shumë se që ishte e paraparë me çdo model për parashikim të motit, prandaj nuk ka model që mund të deshifrojë natyrën në tërësi.
Sidoqoftë nesër do të jetë pak më freskët në tërë rajonin me përjashtim të bregdetit dhe Ultësirës Perëndimore në Shqipëri. Nga e mërkura e posaqërisht nga e enjta mbi rajonin tonë pritet të fuqizohen masat e nxehta ajrore me origjinë nga Afrika Veriore dhe si pasojë pritet ngritje e temperaturave. Vapa do të jetë e fuqishme megjithatë asgjë ekstreme duke pasur parasysh periudhën kohore në të cilën gjendemi.
Në fotografi shihen temperaturat maksimale të cilat në Kosovë do të arrijnë rreth 34-35 gradë celsius, në Shqipëri 36-37 gradë celsius, në Maqedoninë e Veriut 37-38 gradë celsius, ndërsa në Greqi 40 gradë celsius. Këto mund të ndryshojnë në nuanca të vogla dhe për çdo ndryshim do të njoftoheni me kohë në meteoballkan./Meteoballkan
