Franca do të jetë bartësja kryesore e valës më të re mjaft të fuqishme të nxehtësisë verore që po pritet të fillojë, apo në fakt ka filluar në perëndim të Evropes. Përderisa ne po shkojmë drejt vjeshtës së vërtetë kalendarike, në fakt i nxehti veror do të fuqizohet dhe intensifikohet fillimisht në perëndim të Evropes, pastaj në veriperëndim dhe një pjesë eë kësaj nxehtësie jo aq ekstreme sikur në Evropë mund të prekë edhe territoret tona vonë pas disa ditëve.
“Fajtor” për këtë është gjendja sinoptike ku në Mesdheun perëndimor kemi bllokun anticiklonik “Omega”, ndërsa në Iberi dhe jug të Mesdheut kemi dy sisteme ajrore me presion të ulët atmosferik. Blloku “omega” mundëson transportimin direkt të ajrit shumë të nxehtë afrikan nga veriu i Afrikes në drejtim të Evropes perëndimore dhe veriperëndimore. Franca do të jetë më e goditura me temperatura që mund të prekin edhe shifrën 40 gradë Celsius, pastaj do të jenë shtetet e Beneluksit dhe Britania e Madhe. Pastaj, Gjermania dhe disa vende në Evropen qendrore, pjesë të Skandinavisë dhe Ballkanit.
Sistemi ajror me presion të ulët atmosferik që ka depërtuar dhe është zhvilluar në jug të Mesdheut ka ulur temperaturat në territoret tona dhe ka sjellë edhe reshje e rrebeshe lokale shiu, ndërsa stuhi të fuqishme uraganike mund të godasin territorin grek gjatë ditëve të ardhshme. Priten erëra të stuhishme, shira të rrëmbyeshëm dhe breshër masiv. Përderisa Greqia dhe Spanja goditen nga stuhi dhe shtrëngata të forta, në Francë kulmojnë temperaturat verore. Një tjetër sistem ajror me presion të ulët atmosferik po bënë kërdinë në Spanjë dhe Portugali. Mes këtyre dy sistemeve kemi sistemin masiv me presion të lartë atmosferik ose bllokaden “Omega” anticiklonike.
Sidoqoftë, në territoret tona pritet të kemi përmirësim gradual të motit dhe po ashtu pritet të kemi rritje të temperaturave. Në viset bregdetare të Shqipërisë dhe Mali të Zi temperatura shumë shpejt do të shkojë përsëri deri në 30 ose shumë afër 30, ndërsa në viset kontinentale rritja e temperaturave do të jetë më e ngadalshme ose më graduale./METEOBALLKAN
