Vera 2022 po shënohet me valë mjaft të fuqishme të nxehtësisë verore anekënd Evropes, Azisë dhe Afrikes duke shkaktuar zjarre masive në Spanjë, Portugali, Francë etj. Sot Britania e Madhe regjistroi temperaturen më të lartë ndonjëherë në këtë vend.
Qindra persona kanë humbur jetën në Portugali, Spanjë dhe Francë si pasojë e temperaturave të larta këtë verë, ndërsa britaniket e pamësuar me këtë nxehtësi po përballen me temperaturat më të larta ndonjëherë në vendin e tyre.
Numri i viktimave pritet të rritet ditëve në vijim.
Valë të fuqishme nxehtësie sivjet ka në shumë vende të Afrikes, Azisë dhe Lindjes së Mesme. Edhe pse në këto vende vera gjithmonë është e nxehtë, megjithatë vlenë të potencohet se valët e nxehtësisë gjatë këtij viti janë më intensive se zakonisht.
Rajoni ynë deri më tani ka qenë mjaft me fat, me përjashtim të viseve mesdhetare të Shqipërisë të cilat kanë përjetuar temperatura mjaft të larta. Viset tona kontinentale deri më tani kanë përjetuar verë krejtësisht normale, madje në disa vise mesatarja ka qenë edhe më e ulët se zakonisht.
Gjërat pritet të fillojnë të ndryshojnë ngase ajri mjaft i nxehtë në Evropë dhe Afrikë pritet të shtrijë ndikimin e tij edhe në territoret tona. Edhe nesër (e mërkurë) priten temperatura rreth vlerave normale, ndërsa duke filluar nga e enjta temperaturat do të fillojnë të rriten ndjeshëm dhe kështu ato maksimale pritet të qëndrojnë mbi 35 gradë Celsius për disa ditë me radhë e ndoshta edhe javë./MeteoBallkan
