Temperaturat kanë shënuar rritje pas goditjes së fuqishme polare të ditëve të kaluara, por ende mbetet relativisht ftohtë. Temperaturat këto ditë janë në suaza të normales për këtë periudhë kohore.
Rajoni ynë mbetet nën ndikimin e masave ajrore kryesisht anticiklonike, me depërtime të herëpashershme të fronteve të ftohta kryresisht të dobëta nga Skandinavia. Anticikloni i fuqishëm përtej Britanisë së Madhe nuk po lejon krijimin e ndonjë ciklogjeneze të fuqishme në Adriatik e cila mund të na sjellë reshje bore, sidoqoftë ditëve të ardhshme na pret mot i ndryshueshëm dhe priten depërtime të disa fronteve të dobëta të ftohta ajrore në kuadër të cikloneve nga Skandinavia dhe Evropa lindore.
Këto fronte herë pas here do të kushtëzojnë shtim të vranësirave dhe reshje sporadike shiu e bore. Nuk priten reshje të mëdha. Priten edhe ulje të herëpashershme të temperaturave, por nuk pritet ndonjë i ftohtë i madh.
Në Shqipëri priten riga afatshkrutra lokale shiu, ndërsa fjolla bore vetëm në pjesën lindore të vendit. Në Kosovë nëpër ultësira priten riga të izoluara shiu, ndërsa në viset pak më të larta fjolla lokale bore, por reshjet do të jenë afatshkurtra dhe karakteristikë më e theksuar e motit të ditëve të ardhshme do të jenë atlernimet mes vranësirave dhe intervaleve kohore me diell, pra “paterni” më dominant do të jetë moti i thatë.
Me daten 1 Shkurt pritet të kemi një front pak më të fuqishëm të ftohtë ajror i cili pritet të kushtëzojë një ciklogjenezë pak më të fuqishme diku në Detin Adriatik. Ky ciklon mund të na sjellë reshje pak më intensive, fillimisht shiu e pastaj edhe bore, por përsëri pa ndonjë skenarë të vërtetë dimëror nëpër vendet më të ulëta./MeteoBallkan
