Në viset tona kontinentale po vazhdon mot mjaft i nxehtë, por me mundësi për zhvillime lokale që e bëjnë motin të ndryshueshëm. Për shkak të ardhjes së një fronti të dobët, të ftohtë ajror kemi edhe erëra mesatare deri të fuqishme, por ky front nuk po ndikon në uljen e temperaturave, ngase rrymimet e ajrit të nxehtë janë të forta.
Sidoqoftë, me ardhjen e shtrëngatave të izoluara pritet freskim i motit në zonat e rrebesheve të shiut.
Edhe sot pasdite pritet destabilizim i pjesshëm i atmosferës ku vende-vende priten rrebeshe afatshkurtra shiu me vetëtima, bubullimë dhe mundësi për breshër. Reshjet do të jenë të kufizuara në zona të caktuara dhe në shumë vise nuk priten fare reshje, por në ato zona ku ndodhin ato mund të jenë të fuqishme në afat jo shumë të gjatë.
Nuk përjashtohet mundësia e krijimit të ndonjë shtrëngate të fuqishme lokale me breshër.
Në viset bregdetare po mbretëron mot i nxehtë dhe me diell dhe kështu pritet të vazhdojë edhe ditëve të ardhshme. Përkeqësim substancial të motit pritet të kemi rreth mesit të javes së re ku priten rrebeshe, reshje shiu dhe ulje e temperaturave. Gjatë fundjaves tjetër priten ulje të theksuara të temperaturave./MeteoBallkan
