Deri më tani muaji Tetor po vazhdon me mot relativisht të ngrohtë dhe deri më sot kemi pas rreze të shumta diellore. Sot vranësirat kanë mbërthyer rajonin për shkak të ndikimit të ciklonit mesdhetar.
Temperaturat nuk kanë shënuar ulje të theksuara ngase masat e ftohta ajrore janë larg në verilindje të Kontinentit, ndërkohë që kemi ulje kryesisht të lehtë të tyre këto ditë për shkak të vranësirave dhe riga lokale të shiut.
Fundjava na sjellë përsëri intervale kohore me diell dhe rritje të temperaturave. Ndikimi anticiklonik do të fuqizohet dukshëm gjatë fundjavës me netë dhe mëngjese të ftohta dhe ditë relativisht të nxehta, ndërkohë nga Mesdheu do të ketë depërtim gradual të masave të ngrohta ajrore nga fillimi i javës së re dhe kështu priten rritje të mëtutjeshme të temperaturave dhe sipas të gjitha gjasave na pret e ashtuquajtura “verë indiane” që është karakteristikë e muajve vjeshtor kur kemi disa ditë mot stabil dhe temperatura rreth 22 deri 24 – 25 gradë Celsius./MeteoBallkan