Edhe kjo javë në të cilën hymë do të karakterizohet me mot mjaft të ndryshueshëm dhe kryesisht jo stabil
Dy ditët e para të javës pra sot dhe nesër (e Martë) do të jenë mjaft të ftohta dhe me shira të lokalizuara. Reshje shiu apo rrebeshe më intensive priten nesër gjatë mesditës apo pasdites në Kosovë ku vende-vende mund të ketë ndonjë vetëtimë dhe bubullimë.
Nga e mërkura do të pasojë ngritja graduale e temperaturave dhe po ashtu do të kemi fuqizim gradual të erërave jugperëndimore. Rrebeshet do të jenë më të rralla dhe më të lokalizuara dhe ato mund të priten kryesisht në veriperëndim dhe veriun e skajshëm të Kosovës.
Të enjtën dukshëm më nxehtë, por priten alternime vranësirash dhe intervaleve kohore me diell dhe aty-këtu ndonjë rrebesh i izoluar në viset kontinentale.
Të premtën pasdite vonë dhe të shtunën do të kemi ciklonin e ri i cili do të depërtojë gradualisht në rajon nga Mesdheu dhe Shqipëria. Në tërë rajonin priten reshje shiu, kurse lokalisht do të ketë edhe rrebeshe të fuqishme me vetëtima dhe bubullimë.
Sipas ecurive aktuale sinoptike dita e diel pritet të jetë mjaft e nxehtë dhe kryesisht me diell.
Ishte ky parashikimi javor me disa fjali të shkurtra dhe nëse ka ndonjë ndryshim do tu njoftojmë në postimet tona të përditshme, pra më një fjalë përpos ngritjes së temperaturave nuk duhet pritur stabilizim të motit edhe gjatë kësaj jave./Meteoballkan
