Para nesh janë disa ditë mjaft të nxehta. Sot temperatura maksimale do të arrijë deri rreth 30 gradë celsius, kurse ajri i nxehtë me origjinë nga Afrika Veriore do të depërtojë ndjeshëm në rajonin tonë duke përfshirë edhe Kosovën nga nesër, edhe pse nuk pritet të zgasë shumë. Para nesh janë ditë tipike verore, me shumë rreze diellore dhe shumë pak vranësira. Nuk priten ekstreme sikur në Evropë, prandaj për këtë të jeni të qetë, por normalisht duhet patur kujdes në orët e pikut.
Nesër në Kosovë temperaturat do të arrijnë rreth 34 gradë celsius ajo maksimalja në nivel vendi, kurse pasnesër rreth 36-37 gradë celsius. Të mërkurën do të ketë ulje të lehta të temperaturave si dhe mundësi për rrebeshe lokale shiu me vetëtima dhe bubullimë, por prapëseprapë do të mbetet nxehtë dhe me zagushim. Ato rajone që do të kenë fatin të preken nga rrebeshet e shiut do të freskohen dukshëm. Rrebeshet do të jenë të karakterit lokal dhe nuk do të përfshijnë tërë territorin.
Në bregdet vazhdon mot me diell dhe i nxehtë pa gjasa për ndonjë “prishje” të motit. /Meteoballkan
