Vranësira të dendura janë duke ardhur nga Italia në kuadër të një mase ajrore jo-stabile që sjellë reshje shiu dhe ulje të temperaturave. Kjo masë ajrore do të kushtëzojë gjatë ditës së martë reshje shiu, lokalisht intensive dhe pritet të jetë një ditë tipike e ftohtë vjeshtore, ndërsa fjolla bore priten në bjeshkët më të larta të Kosovës, Shqipërisë dhe Maqedonisë së Veriut.
Kjo masë kalimtare ajrore do të sjellë reshje të dendura shiu sidomos në shumë vise të Shqipërisë dhe Maqedonisë së Veriut, por duke mos përjashtuar edhe jugun dhe juglindjen e Republikës së Kosovës, ndërsa në veri të Kosovës priten reshje të pakta shiu edhe pse kjo mund të ndryshojë, ngase një ndryshim krejtësisht i vogël në trajektorën e ciklonit mund të sjellë reshje shiu në tërë Kosovës.
Cikloni do të jetë kalimtar dhe në mbrëmje reshjet do të pushojnë. Nga e mërkura do të kemi përmirësim të motit, me alternime mes vranësirave e intervaleve kohore me diell. Edhe në aspektin termik temperaturat shënojnë rritje nga dita në ditë duke kulmuar ditën e premte dhe të shtunë me masa mjaft të ngrohta ajrore për këtë periudhë kohore./METEOBALLKAN
