Me ardhjen e pranverës dhe rritjen e temperaturave shtohen gjasat që të paraqiten edhe fenomenet më interesante atmosferike siç janë zhvillimet konvektive ose vertikale të vranësirave në atmosferë të cilat ‘dhurojnë’ rrebeshe dhe shtrëngata shiu me vetëtima dhe bubullimë.
Gjatë stinës së dimrit këto fenomene janë shumë të rralla në rajonin tonë me përjashtim të bregdetit dhe kjo për shkak të temperaturave të ulëta, por me rritjen e temperaturave gjatë pranverës dhe verës stuhitë me vetëtima janë dukuri gjithnjë e më të shpeshta dhe krejtësisht normale.
Çdo front i lagësht i cili përmban ajër të paqëndrueshëm që vjen nga Atlantiku në kontakt me sipërfaqën e ngrohtë të Kontinentit nga dielli pranveror dhe veror ka potencial për destabilizim të fuqishëm të atmosferës dhe si pasojë lindin rrebeshet e fuqishme të shiut me vetëtima dhe bubullimë.
Një front i tillë parashihet të premtën dhe për fundjavë të depërtojë në Ballkan dhe ka gjasa që të prekë edhe Kosovën ku përpos shiut priten edhe rrebeshe lokale shiu me vetëtima dhe bubullimë. Disa modele parashohin ulje të theksuara të temperaturave dhe mundësi edhe për reshje bore këtë vikend në Kosovë, por kjo ende nuk është e sigurtë për shkak të dallimeve shumë të mëdha mes sy modeleve kryesore globale për parashikim të motit.
Rrebeshet e shiut gjatë verës gati gjithmonë janë të karakterit lokal dhe shpeshherë ndodhë në të njëjtin qytet në të njëjtën kohë një pjesë e qytetit të ketë vërshime, kurse pjesa tjetër të ”djeget” nën rrezet diellore./Meteoballkan
